【場地點樣】改鋪冬草前今晚谷草夜賽照跑好地

跑馬地今晚夜賽如常，共編9場草地賽，以移欄B跑道進行角逐，頭場開跑時間晚上6時40分，就目前場地預測，掛牌「好地」，度地儀指數2.72。

今日氣溫急降，朝早亦有幾陣細雨，天文台雖然預測會有幾陣雨，自然期望可以對今晚場地影響有限，能夠維持「好地」狀況當然最理想。

值得一提跑完今次賽事，下周夜賽改跑星期四，兼且移師沙田跑全泥宴，又係一年一度改鋪冬草工程，接住11月2日及5日兩期谷草賽事，就會使用狹窄之C欄及C+3賽道，配合工程循序進行，要知道改鋪冬草之後，場地狀況又會因應草種生長情況，出現新景象，會否又會出現馬迷擔心嘅嚴重場地偏差情況實未可料，倒不如把握當前機會，揀馬可能更加得心應手。

至今谷草夜賽次數不多，B欄亦只跑過一次，田泰安與黃智弘起孖成績最好，結合上季B欄成績，田泰安去季11W做三哥，新季即刻打響頭炮保持水準，以去季成績而論，只有3位騎師頭馬數字突破雙位數，除田泰安之外，潘頓以12W排第二，行頭又會係邊位?

就係艾兆禮，以15W成為去季谷草B欄王，雖然今季首戰5駒全數落敗，今晚亦有「顏色之皇」與「勁好運」叫胡，但論平均實力，田泰安依然秤先，潘頓雖然不乏實力坐騎，熱門之選值搏程度自然偏低。