【場地點樣】10月重啟谷戰　今晚掛牌好地

經過連跑三次沙田日賽之後，終於返回谷草挑燈夜戰，而且更係今季首次編跑9場賽事，以C+3賽道進行角逐，頭場開跑時間提前為晚上6時35分，敬請馬迷留意。

至於今晚賽事，經今晨勘察場地後，掛牌「好地」，度地儀指數為2.72。以馬會今季新公布「天氣及跑道狀況」備忘，相對濕度只係55.4%，土壤濕度7.7%，响炎熱無雨嘅天氣加持下，估計今晚將會一如對上一期9月17日夜賽，場地會愈跑愈快，跑完一兩場之後就會轉換掛牌。

由於上月底受打風影響，加上連跑3期沙田日賽，實際今期只係季內第三次谷草夜賽，而今晚首次以最窄移欄進行競逐，當然跑道變窄馬匹取位推進更加緊迫，前置型緊守好位，比起留後靠追跑法，前者始終秤先。

最位靈活騎騎，當然係幫助甚大，就以上季谷草C+3欄表現最出色騎師，潘頓可以講係一支獨秀，唯一一位突破雙位數嘅騎師，共摘下13W，布文排次席只得9W，但睇番出賽次數，去季C+3欄夜賽總數63場，一哥只係跑咗41次已經有呢個成績，但布文跑咗56場遠超佢嘅出賽次數。

結合上季成績，潘頓今晚出馬雖然只得6件，但唔少坐騎更有排檔之助，比起今晚以量取勝嘅田泰安、巴度，或係艾道拿之流，潘一哥騎師王開飛至今，繼續成為大熱自然不無道理。