仲勁過潘頓　捧袁幸堯田草1200米同有運

袁幸堯尋日連中三元做埋騎師王，認真巴閉，尤其尾場夥拍「友瑩仁」頂得住潘頓嘅「綫路英雄」，盡顯功架。其實袁幸堯除咗呢場鬥贏潘頓，原來佢今季亦有一樣嘢勁過潘頓，就係田草1200米，今季佢暫時喺呢個路程上陣5次，成績係3冠1亞1季，上名率100%，反而潘頓跑9次都係得2冠1亞2季。

而喺周日沙田賽事，有4場田草1200米賽事，袁幸堯除咗尾場冇坐騎，其餘3場都有份參與，清一色騎晒伍廐馬，分別係「同有運」、「長勝金剛」及「添開心」，睇嚟伍鵬志都知道呢位小將強項。

如果講機會，頭場五班田草1200米嘅「同有運」，開鑼日正正係袁幸堯胯下贏五班田草1200米，彈甩對手近3馬位，姿態輕鬆，無疑今次多孭13磅，但繼續抽5檔，兼且伍鵬志亦覺得呢匹用得唔多嘅7歲馬仲有啲上升空間，有權再下一城啦。