再任頒獎嘉賓　何澤堯頒獎畀賀銘年仲同巴米高合照！

本地華將何澤堯自2月發生落樓意外後，便一直養傷至7月，期間騎者除咗留港治療之外，亦有飛往瑞士進行更多復康治療。雖然何澤堯7月已經好番，但都臨近抖暑，都不妨趁暑假熱身兼充好電準備新季。

今個暑假，何澤堯會前往英、法兩地。何澤堯有到英國觀賞古活賽期，並擔任頒獎嘉賓。何澤堯離開英國後，再返法國尚蒂伊出席晨操，主要操練馬匹。剛周日(8月10日)法國多維爾馬場舉行的紀爾斯大賽日，何澤堯再以嘉賓身份參與其中，而且，佢亦再一次成為頒獎嘉賓，更頒獎畀已返法國發展的賀銘年，認真巧合。

何澤堯喺社交平台表示多謝法國賽馬會邀請，亦好榮幸可成為頒獎嘉賓，能與多位世界級好手見面當然係值得高興的事情。