「喜」系精品運港服役加盟方嘉柏

Share News :

根據澳洲方面報道,「喜」系大馬主羅建生旗下於昆士蘭發展之兩歲新星Capital Tower,稍後將會運港服役,並且交由方嘉柏訓練。

「喜」系掌舵人羅建生,近年亦係圈中馬主嘅中流砥礪,不惜工本買馬,其至在外地養馬,務求有好馬運港向大賽進軍,而呢匹Capital Tower係佢周歲時以60萬澳元高價投得,先在當地服役,並交由練馬師高亮能(Tony Gollan)訓練,甫出賽便一口氣連勝3仗,近兩仗升呢跑分級賽,分別出戰兩場G2香檳錦標同種馬錦標,結果跑第5同第4。

原本呢匹馬已經報爭下周末鷹園舉行嘅G1阿堅斯錦標(JJ Atkins),不過練馬師高亮能表示將會棄權,因為馬主已經同意,本周安排呢匹馬進行閹割,待復原之後,就會正式運港服役。

「喜」系在港馬匹一直與蔡、柏兩廐合作愉快,而方仔今季訓練「喜旺駒」完成4捷不敗驕人紀錄,原本上季亦有匹「喜豐寶」向經典系列進軍,可惜於香港經典一哩賽跑跛腳而要除名,如今有呢匹Capital Tower作為補替生力軍,下季以3歲之齡來港服役,預計必有一番功業。

Close