月底跑女皇盃前　同工之妙鎖定下個目標

香港瓶得主「同工之妙」，呢個月底接受邀請重臨出戰女皇盃，近日殿堂級練馬師費伯華，就透露咗呢匹馬跑完嘅動向，雖然有啲網民寄望呢匹馬賽後留低，繼續出戰途程更加合適，響5月24日舉行嘅冠軍暨遮打盃，但係成數就好微，事關費伯華已經定咗下個目標…。

「同工之妙」響完成月底香港行程之後，跟住就會飛返法國，而佢下一仗嘅目標，並唔係留響本土出賽，而係鎖定目標轉向英國，留待7月25日雅士谷馬場舉行嘅英皇錦標。

費伯華今季留番「同工之妙」以5歲之齡繼續服役，分屬轉作種馬前最後一季，自然期望重點出擊，英皇錦標向來視為英國最高榮譽嘅2400米國際一級賽，當然係歐洲頂流賽駒夢寐以求嘅榮耀，即使去年「同工之妙」去年夏天亦曾遠征英國，於沙丘園舉行嘅日蝕大賽慘賽，無礙佢再度遠征英國決心。

至於「同工之妙」今次來港需要縮程出擊，但係以呢匹馬自國際賽後一直休息至今，充滿新鮮感，加上此駒過去三季於法國都係一出即勝，特別利於蓄銳出擊，尤其上季初與法國復出跑新鮮，一口氣連贏開季首兩項1800米G1：根利錦標與伊斯巴翰錦標，實力毋庸置疑。

「同工之妙」將於本星期五(3日)進行遠征前草地快跳最後檢閱，然後就會進入隔望營檢閱，稍後就會飛赴香港，為月底舉行之女皇盃準備就緒。