潘頓點解揀睿盛人生？會唔會騎晒3關？

潘頓尋日終於作出決定，將會喺4歲馬經典系列賽首關香港經典一哩賽，替伍鵬志旗下「睿盛人生」上陣，此駒目前評97分，為4歲馬中評分第2高，僅次於跑開短途嘅「顏色之皇」，如無意外會喺香港經典一哩賽掛頭牌。

潘頓表示今次好大機會係佢來港之後，面對最困難嘅選擇，因為所有騎開嘅賽駒都有進步，今年會喺近年競爭最激烈香港經典一哩賽，可能14匹馬都有爭勝機會，最後都係取決於檔位、步速形勢及跑道偏差。

「睿盛人生」上仗成功克服二班，係潘頓揀呢匹馬跑首關嘅原因之一，他說：「要一匹喺香港出賽咁少嘅賽駒，咁快贏到二班，仲要孭重磅，對於4歲馬嚟講係一件非常困難嘅事。」

不過，潘頓只係應承咗騎「睿盛人生」跑頭關賽事，之後香港經典盃同埋戲肉打吡則未有任何承諾。潘頓特別提到「小鳥天堂」係今年4歲馬之中質素最高，但目前欠缺1600米氣量證明，惟有忍痛放棄。