積極備戰下月馬會盃復出　浪漫勇士明早再試泥地大閘

重陽過後，沙田試閘明日復常，而且相當繁忙，全朝共編7組泥地大閘，參加馬匹合共65匹，第一組9匹出試馬中，8駒都係過百分馬匹，焦點所在，自然落響新季第三次由布文替工試閘嘅「浪漫勇士」。

「浪漫勇士」自五月左前球節受傷，接受手術後經過抖暑復原理想，8月露面已經重新跟上新季操練程序，迎接下月23日在港首度復出，於中銀香港賽馬日列陣，備戰工夫自然循序加辣。

9月底以至10月，「浪漫勇士」先後試過谷閘，與及沙田草地大閘，沈集成對於一課比一課進步嘅走勢坦言滿意，明日移師泥閘，繼續指定由布文仄試，進度如何，馬迷明午透過上網試閘片段自有分曉。