轉彎唔掂　方仔幫星運傳奇拗番「直」

啱啱禮拜三跑馬地賽事，以往黑夜之神方嘉柏會大開殺戒，點知全晚靜如深海，7匹參戰馬只得「精彩駿將」跑第3名，搞到畀嗰晚起孖希斯過咗頭，目前喺練馬師榜排喺第3位。而喺聽日沙田賽事，重頭戲香港經典一哩賽，方嘉柏冇份玩，其餘場次亦只得5駒出擊，卻有機會憑「星運傳奇」重啟勝門。

4歲澳洲自購馬「星運傳奇」去年10月尾在港初出跑三班田草1000米直路賽，結果以頸位之微擊敗「飛來閃耀」，順利一出即勝，之後兩戰卻嘗試增程跑田草1200米，但效果平平，兩場名次都係雙位數。

既然喺轉彎路程無嘢睇，方嘉柏唯有安排「星運傳奇」回師勝途1000米直路賽，埋門安排拍跳彈草閘，走勢吸引，同埋今次只係比初出贏馬一役多孭兩磅，檔位又唔差，睇吓係咪可以回復真身。