重返南非唔愁支持　董明朗周末復出跑G1

董明朗雖然失意香港馬圈，重返南非依然不愁支持，未起程之前已經卜定連續兩個禮拜嘅G1坐騎，返回老家，呢個周末急不及待重投戰線，於凱尼沃斯馬場開普敦雌馬堅尼賽日復出，當日10場賽事，佢就已經卜咗7匹坐騎，人氣依然高企。

響本周末復出賽事，董明朗於重頭戲，1600米G1開普敦雌馬堅尼，就會夥拍格林福旗下「金棕櫚」(Golden Palm)覬覦錦楆，其餘場次佢亦得到史奈斯及桂福特公子桂定輝嘅支持。

講番重頭戲，原本「金棕櫚」一直由霍勵賢主理，今季6戰更加5贏1位，貴為冠軍級人馬，大賽自然有得揀，結果佢就心繫桂定輝訓練，至今3戰未逢敗績Reet Petite，魚與熊掌之下漏出季內6戰5贏1位「金棕櫚」，睇吓董明朗能否執到寶響大賽重振聲威。

下周末(13日)同樣響凱尼沃斯馬場賽事，董明朗亦都卜定另一場G1坐騎，響3歲1600米G1好望角堅尼(Cape Guineas)，佢就卜定策騎出自史奈斯嘅「馬彌姆斯」(Malmesbury Missile)。