遨遊氣泡帥權誰屬？輝哥話……

麥道朗雖然幫「遨遊氣泡」贏董事盃，但香港金盃未能再騎此駒上陣。

姚本輝早前飛往澳洲出席殷利殊經典周歲馬匹拍賣會並購入兩駒，輝哥所投嘅其中一駒，更加係首日拍賣會全場最高價37.5萬澳元(折合約190萬港幣)嘅一駒。輝哥越洋揀蟀後已回港，今晨(14日)復課，全朝不停出出入入睇實旗下馬匹。

昨日(13日)馬會公布香港金盃報名馬名單，姚廐鎮倉寶「遨遊氣泡」至上月底贏完三冠大賽首關1600米G1董事盃之後，練者已決定為此駒報跑次關2000米香港金盃，不過董事盃贏馬功臣麥道朗今次繼續策騎「浪漫勇士」，「遨遊氣泡」自然要換人上陣，唔少騎師虎視眈眈，據悉冠軍騎師潘頓亦曾索騎「遨遊氣泡」。

不過「遨遊氣泡」最後邊個騎？輝哥今日就話仲未諗掂，因為有唔同因素考慮，佢都希望可以搵個可以為「遨遊氣泡」長期效力嘅騎師，事關此駒唔排除之後遠征，當然都要諗真啲先，所以現時都未決定邊個騎「遨遊氣泡」呀！

姚本輝日前飛往澳洲出席馬匹拍賣會，回港後今日(14日)首日復課。