闖珠峰一手好牌　潘頓仲有餐士馬叫胡

悉尼春季嘉年華，重頭戲自然係10月18日舉行嘅英皇查理斯三世錦標賽日，除咗主題呢場G1賽，萬眾矚目當然係全球最高獎金短途賽事，1200米一級賽珠穆朗瑪峰錦標，潘頓夥拍「嘉應高昇」出戰珠峰，自然成為焦點所在，而潘頓喺呢個重要賽日，又點會只係齋騎一匹「嘉應高昇」。

呢日舉行嘅1600米G1英皇查理斯三世錦標，潘頓又有惡馬在手，將會夥拍英國賽駒，由練馬師郗國思訓練，上屆金鷹盟主「湖林麗城」，今年就轉戰呢項1600米一級賽。上屆「湖林麗城」係由范奕倫於金鷹錦標奪魁，不過今年出戰呢項賽事，咁啱與英國馬季煞科撞介，所以今場郗國思都要另覓高手幫助。

潘頓如今接手，亦可知一哥有麝自然香，唔只澳洲、日本，原來英國練馬師都會樂於合作，據知新一屆於11月1日舉行嘅金鷹錦標，英國賽駒「路德探長」(Luther)，練馬師范朗善原來亦有意亦想搵一哥幫手，不過金鷹錦標今年申請升格未獲批准，由於唔係國際一級賽，相信香港賽馬會，亦唔會批准一哥出戰金鷹錦標。